Во петок, на 31-ви мај, во Народниот Театар „Војдан Чернодрински” во Прилеп, со почеток во 19 часот, Театарот „Јордан Х.К-Џинот”, Велес ќе го отвори театарскиот фестивал за деца „Силјан Штркот” со претставата за деца „Црвенкапа” во адаптација на Сашо Димоски, а во режија на Деан Дамјановски.
„Црвенкапа” е современа адаптација на добро познатата сказна за Црвенкапа и лошиот волк и истата е наменета за деца и младинци. Претставата покрај комичниот и забавен елемент, има и едукативен карактер, правејќи јасна споредба помеѓу безбедноста на градот наспроти опсаностите на шумата, нагласувајќи ја презафатеноста на родителите и преокупираноста на децата со мобилните телефони, но и потребата од консумирање на здрава храна.
Сценографијата за претставата е на Филип Коруновски, костимографијата на Катерина Чукниева, а автор на музиката е Сашко Костов. Во претставата настапуваат актерите: Славица Манаскова како Црвенкапа, Васил Зафирчев како Волкот, Самоил Стојановски како Ловецот, Весна Димитрова Бобевски како Бабата и Кети Борисовска како Мајката.
