17.05.2024
Пред повеќе години, познатата американска авангардна артистка Лори Андерсон, ќе каже:
“Да зборуваш за музика, тоа е како да играш објаснувајќи архитектура”.
Нема соодветни зборови да се опише настапот на Џамбо Агушеви оркестар во Тирана, одржан неодамна, тоа беше нешто многу, многу посебно.
Агушеви пред да настапат во Тирана, имаа неколку концерти во Германија и авионски стасаа до Скопје, та од таму, веднаш со автомобили тргнаа за Албанија каде стасаа ноќта пред нивниот овдешен концерт.
Нивниот настап беше во организација на македонскиот Културно информативен центар во Тирана, заедно со овде познатиот тирански фестивал ,,Clouds,, под водство на директорката Едит Пула.
Овој фестивал се одржува секоја година. Овојпат, простор кој се наоѓа во центарот на градот, беше исполнет до последно место со публика. Агушеви настапија супериорно, величествено убаво, свиреа технички совршено во манир на големи светски артисти, плетејки мрежа од прекрасни мелодии.
Публиката стануваше, играше занесена како во транс, дел од нив се качуваа на сцена играјќи заедно со овие музичари.
По двочасовен фуриозен настап, публиката не сакаше да замине и музичарите се враќаа неколкупати на бис. Веднаш после настапот, Џамбо Агушеви, отпатуваа на концерт во Бугарија.
Македонскиот Културно Информативен Центар во Тирана, најавува уште еден настан. На 23 мај во Тирана ке настапат ДОБРИЛА и ДОРИАН ДУО.
photos by Gerta Kordalli / Tirana 2024
