Сојузот на просветните работници на Р С Македонија, на ден 12.03.2025 година (среда) организира постхумна средба, во спомен и почит кон просветителското-педагошкото дело на проф Ленка Гогоска (Попоска) со наслов
„65 години просветителска и хуманитарна дејност“
На средбата ќе зборуваат членови а Сојузот, професори, студенти на професорката, новинари и претставник од Агенцијата за иселеници. Ќе биде прикажан дел од документарниот филм “Творештво поврзано со семејни вредности“ (2007).
Ленка Гогоска (Попоска) во својот професионален живот го изоде патот на образованието од училиште, наставник , советник во Заводот за училиште на град Скопје, професор на факултет до пензионирање, на Педагошкиот факултет „Св Климент Охридски“ од Скопје. После пензионирањето со несмален интензитет, работеше на учебничката и публицистичка дејност, создавајќи дела кои се и паметниците и патоказите за најзначајниот дел од општествениот раст а тоа е образованието и воспитанието.
Како завет што го исполни семејството во октомври 2024 година, беше доделена донација од 3000 книги, за сите македонски училишта , библиотеки и Црковни општини во светот, со поддршка на Агенцијата за иселеници.
Нејзината мисла која ја зборуваше секогаш беше: “Да се говори и создава на нашиот мајчин македонски јазик е привилегија, но да има таа можност да се образуваат генерации, е Божји благослов“.
Средбата ќе се одржи во Домот на културата „Билјана Беличанец“ во Кисела Вода, со почеток од 18 часот. Водител на настанот ќе биде артистката Снежна Конеска.
