Битола, 29.03.2023
Денес во Битола се одржа третиот регионален настан во организација на Проектот „Биди ИН, биди ИНклузивен, биди ИНклудиран” кој е финансиран од Европската Унија. Проектот се заложува за квалитетно и инклузивно образование со цел секое дете да има еднакви можности за развој, учење и остварување на своите потенцијали, а го спроведува Фондацијата „Чекор по чекор” заедно со своите партнери Здружението за промоција и развој на инклузивно општество „Инклузива” и Здружението за давање услуги на лицата со попреченост „Хандимак”, вo соработка со Министерството за образование и наука.На овој настан присуствуваа претставници од општини, училишта, невладини организации и медиуми. Во воведното излегување на настанот претставниците од проектот направија презентација на проектните активности во пелагонискиот регион што вклучува училишни грантови и пакети за поддршка за 4 редовни училишта, обуки за градење на капацитети на училишни инклузивни тимови за 6 училишта и 10 обучени тутори за работа со стипендистите на Проектот „Биди ИН, биди ИНклузивен, биди ИНклудиран”. Исто така, се разговараше и за придобивките од инвестирање во инклузивно образование и се споделија успешни примери за инклузивни практики.Свое обраќање имаше и градоначалникот на Општина Могила, г-н Драганчо Саботковски кој напомена дека клучот до успехот за инклузивно образование е комуникација помеѓу сите засегнати страни, односно централната со локалната власт, невладиниот, граѓанскиот сектор и семејствата. “Општина Могила во соработка со проектот „Биди ИН, биди ИНклузивен, биди ИНклудиран” опреми сензорно катче во подрачното училиште “Браќа Миладиновци”, село Будаково од кое придобивки имаат сите ученици, а не само учениците со попреченост. За нас како општина е многу важно да направиме стратегија за планирање и инвестиции со цел да изградиме инклузивна општина и затоа се важни настаните од овој тип каде можат да се слушнат искуства и успешни практики.” изјави градоначалникот.”Во Педагошкиот факултет во Битола веќе неколку години се спроведува задолжителна настава по предметот “Инклузивнa Педагогија” кој се состои од теоретски и практичен дел. Ова е многу важен исчекор во креирање на инклузивното образование затоа што идните носители на образовен процес се запознаваат со целите на училишната инклузија, како и алатките и методите кои им се на располагање во креирање на истата, затоа што идните наставници порано или подоцна ќе се сретнат со ученик со посебни образовни потреби во своето одделение или во занималната во предучилишната установа.” изјави професор д-р Марија Ристовска, вработена во Педагошки факултет во Битола.
