Премиера на детската претстава „Новогодишна Магија“

Во сабота, на 21.12.2024 година, со почеток во 18.00 часот во големата сала на НУЦК „Антон Панов“ Струмица, премиерно ќе биде прикажана детската претстава „Новогодишна Магија“. Во режија на Танкица Стојанова, а во продукција на Здружението „Алфа Касиопеа“ Струмица и во соработка со Центарот за Балетска Уметност „Реверанс“, претставата „Новогодишна магија“ има интересна, привлечна приказна која на публиката од различни возрасти ќе пренесе вистинско празнично расположение и убави пораки. Актерската екипа за претставата ја сочинуваат талентираните локални актери Мирче Ташев, Елена Николова, Лилјана Кочева, Ивана Чонева, Катја Маглешева, Лаура Андреева и Коста Ангов. Реализацијата на претставата институционално е поддржана од Општина Струмица.

Во време кога празничните културни активности за деца се дефицитарни, актерката Танкица Стојанова одговори на предизвикот, внесувајќи празнично веселба и културно збогатување во Струмица. Преку овој инспиративен пример, Стојанова ја оживува радоста, имагинацијата и вредностите и ги отелотворува во возбудливата детска претстава „Новогодишна магија”.

„Сезоната на празници е магичен период, но за многу деца таа магија е ограничена на комерцијални прослави. Културните настани кои инспирираат имагинација, креативност и вредности, за жал, од ден на ден се сѐ помалку. Ова за мене беше поттик да креирам “Новогодишна магија“ во форма на детска театарска претстава во која подеднакво ќе уживаат и родителите. Новогодишната магија е радост и веселба, потсетник за убавината на празничниот период и за важноста на добрината и заедништвото. Се надевам дека со нашата Новогодишна магија ќе донесеме многу забава, новогодишно расположение и значајна порака за вистинскиот дух на сезоната“ – изјави Танкица Стојанова.

Празничното расположение и пораки се рефлектираат и во приказната на претставата, која го прикажува светот на група деца кои се подготвуваат за новогодишната ноќ. Среде блескави украси, исчекување и доза сомнеж од скептикот по име Васко, претставата ги истражува темите на верувањето, добрината, љубовта, надежта и заедништвото.

Сите заинтересирани ќе може да ја погледнат премиерата на детската претстава „Новогодишна Магија“ во сабота, на 21.12.2024 година, со почеток во 18.00 часот во големата сала на НУЦК „Антон Панов“ Струмица. Билетите се достапни по пристапна цена од 150 денари и може да се купат на билетарницата на НУЦК „Антон Панов“, од понеделник до петок, во период од 08:00 до 15:00 часот.

Во време кога празничната магија за децата е ограничена на комерцијални прослави, Струмица збогатена со еден од ретките културните настани кои инспирираат имагинација, креативност и вредности, смета организаторот и порачува:

Донесете го вашето семејство, споделете ја радоста и нека започне магијата!