1.08.2024
На третата фестивалска вечер од мултимедијалниот фестивал “Гига Фест 2024”,која се одржа на платото пред Градскиот музеј во Крива Паланка, беше проектиран долгометражниот музички документарен филм “The Hip- Brainstorm” во режија на Јане Алтипармаков.
Станува збор за документаристичко ремек-дело, задолжителна филмска лектира за љубителите на музиката и филмот. Автор на оригиналната идеја на „The Hip- Brainstorm“ е Љубиша Петрушевски, продуцент и монтажер Михаил Димитров, звучниот дизајн е на Валентин Видовиќ. директор на фотографија е Наташа Гелева, а снимател Ања Илиева.
По проекцијата беше одржана дискусија со режисерот Алтипармаков, продуцентот на филмот Димитров и директор на фотографија Гелева, а настанот го модерираше Клементина Ристовска.
Јане Алтипармаков е филмски работник, музички критичар, арт-теоретичар. Потписник е на стотина текстови од областа на филмот, независната музичка сцена и културата, објавени во бројни домашни магазини, дневни весници и портали. Како режисер и продуцент се потпишува на повеќе документарни филмови, кратки форми и видеозаписи. Добитник е на наградата за особен придонес и развој на македонската алтернативна сцена (The Hip-Reality Overdrive) и на специјалната награда за музички филм (The Hip-Brainstorm). Работи и како фото- документарист, а ова беше прво запознавање на кривопаланечката публика со неговото творештво.
Годинава, „ГИГА Фест“ е дел од Кривопаланечко културно лето и манифестацијата „Крива Паланка- Град на културата 2024“.
