Август, 2024
Околу 30-тина поети од земјава и од странство настапија на 14-та по ред Меѓународна поетска манифестација „Лирски треперења“, што ја организира НУ Центар за култура од Крива Паланка.
На летната сцена на Градскиот плоштад во Крива Паланка одекнаа стихови и афоризми од потврдени и современи поети од Штип, Струмица, Скопје, Куманово, Кочани и Крива Паланка, како и од Ќустендил, Бугарија и од Србија.
Манифестацијата ја збогатија и млади локални автори, подмладок на Литературниот клуб „Калин“, кои се претставија со свои лични поетски творби, а целиот настан беше придружуван со музички точки од млади музичари под менторство на проф. Лариса Жулина Митовски.
Поезијата ги сплоти авторите кои ја облагородија сцената на отворено со прекрасна лирска вечер исполнета со стихови и емоции.
„Многу сум задоволен што по 14 пат ја организираме манифестацијата „Лирски треперења “ на која угостуваме околу 30-тина поети од земјава и од странство. Манифестацијата станува се поуспешна, сите се задоволни, сѐ повеќе поети сакаат да учествуваат, така што планираме да ја прошириме следните години“, истакна Антони Стојановски, директор на Центарот за култура од Крива Паланка.
Поетите изразија задоволство што се учесници на „Лирски треперења“ и се заблагодарија на гостопримството на домаќините.
