На 30 јануари 2025 година во Националната галерија Даут Пашин амам се одржа комеморација за македонскиот сликар Коле Манев, кој остави силен печат и голема трага во современото македонско сликарств, уметник и режисер кој почина на 83 години на 22 јануари.
Тивок човек со одмерено однесување но многу силен во својата уметност и реч.
Бегалец од егејскиот егзодус.
-Секоја од неговите слики раскажува приказна за копнеж, разделба и непокорниот дух на оние кои ја издржале раселеноста“, рече кустосот Франговска на комеморацијата на која дојдоа голем број уметници, академици, говореа и министерот за култура и туризам Зоран Љутков и уметницата Дијана Томиќ-Радевска, во име на Друштвото на ликовни уметници на Македонија (ДЛУМ).
До министерот за култура Љутков беа уметницата Јана Манева Чупоска, ќерка на Коле Манев и претседателка на ДЛУМ, Марија Ѓошевска советничка во Министерството за култура, неговиот зет филмологот Атанас Чупоски и синот и новинар Игор Манев, син на Коле Манев.
-Неговото име ќе остане симбол на уметничката слобода, на истрајноста во творењето, н и на големата љубов кон уметноста. Без разлика дали работеше во сликарството, графиката или скулптурата, неговите дела ја доловуваат душата на народот и на неговото време, ја пресликуваат секоја болка, радост и надеж, рече министерот.
Роден на 11 ноември 1941 година во Бапчор, Егејска Македонија. Училиште за применета уметност завршил во Скопје, а неговото уметничко патување е неразделно поврзано со трагичната историја на македонските уметници, кои биле протерани од своите домови за време на Граѓанската војна во Грција 1948 година. Се образувал во Скопје и Белград, каде завршил прв степен на Ликовна Академија, а продолжил да го проширува своето знаење и во Париз и Прага, каде присуствувал на предавања за анимиран филм.
Како режисер и сценарист, Манев остави трајни белези и во филмската индустрија, со два играни филма: „Мост“ (2006) и „Еко Скоп“ (2022). Добитник е на голем број награди за сликарство и филм.
Беше чесен и добар и како човек и многу почитуван поради неговата чест и дело, не само во земјава туку и во странство.
